پاشينيان ارمەنيا پرەمەر-ءمينيسترى بولىپ سايلاندى
ارمەنيا پارلامەنتىنىڭ 59 دەپۋتاتىنىڭ داۋىسىمەن وپپوزيتسيا وكىلى نيكول پاشينيان پرەمەر-مينيستر قىزمەتىنە تاعايىندالدى. سايلاۋ بىتكەن سوڭ پاشينيان پارلامەنتكە «العىس ايتامىن. ارمەنيا مەن ارميان حالقىنا قىزمەت ەتەمىن» دەدى.
نەگىزىنەن وپپوزيتسيونەردىڭ قولىنا بەيرەسمي تۇردە بيلىك بۇدان ەرتەرەك وتكەن ەدى. بۇعان مەملەكەتتەگى جاپپاي نارازىلىق اكتسيالارى مەن ونىڭ بيلىكتەگى پارتياعا ءوزىن سايلاۋعا كوندىرۋى, سايلانباي جاتىپ 8 مامىر كۇنىن دەمالىس رەتىندە جاريالاۋى دالەل بولسا كەرەك.
ايتا كەتۋ كەرەك, پاشينيان ەكىنشى مۇمكىندىكتەن سوڭ پرەمەر-مينيستر بولىپ سايلاندى. ول وزىنە قاجەتتى 53 داۋىستان دا كوپ قولداۋ تاپتى.
سيريادا رەسەي تىكۇشاعى اپاتقا ۇشىرادى
سيريادا رەسەي اۋە-عارىش كۇشتەرىنىڭ كا-52 تىكۇشاعى اپاتقا ۇشىراپ, 2 ۇشقىش قايتىس بولدى. رەسەي قورعانىس مينيسترلىگىنىڭ حابارلاۋىنشا, اۋە اپاتىنا تەحنيكالىق اقاۋلار سەبەپ بولۋى مۇمكىن. بۇل رەسەي اسكەري بورتىندا بولعان ءبىر اپتاداعى ەكىنشى اۋە اپاتى. بۇعان دەيىن 3 مامىر كۇنى سۋ-30سم يسترەبيتەلى قۇلاپ, ۇشقىشتارى قازا تاپقان بولاتىن.
تىكۇشاق 7 مامىر كۇنى تۇندە قۇلاعان. وسى اپاتتا مەرت بولعانداردى قوسا العاندا سيريادا قايتىس بولعان رەسەي اسكەري قىزمەتكەرلەرىنىڭ سانى 87-گە جەتتى. ونىڭ ىشىندە ەڭ ءىرى اپات 2018 جىلدىڭ 6 ناۋرىزىندا بولدى. ول كەزدە ان-26 ۇشاعى قۇلاپ, 39 ادام قايتىس بولعان ەدى.
يەرۋساليمدە اقش ەلشىلىگىن اشۋعا دايىندىق جۇمىستارى جۇرگىزىلىپ جاتىر
كەلەسى اپتادا يزرايلدەگى اقش ەلشىلىگى تەل-اۆيۆتەن يەرۋساليمگە كوشىرىلەدى. وسىعان وراي قالا مەرياسى اقش-تىڭ جاڭا ەلشىلىگىنە نۇسقايتىن جول بەلگىلەرىن ورنالاستىرا باستاعانىن حابارلادى. قالا مەرى نير باركاتتىڭ ايتۋىنشا, العاشقى بەلگىلەر دۇيسەنبى كۇنى يەرۋساليمنىڭ وڭتۇستىك بولىگىندەگى كوشەلەرگە قويىلعان. بۇل اۋداننىڭ تاڭدالۋى بەكەر ەمەس, سەبەبى جاڭا ەلشىلىك ءدال وسى ماڭدا ورنالاسادى دەپ كۇتىلۋدە.
قالا بيلىگى جىبەرگەن سۋرەتتەردە جول بەلگىسىندە اعىلشىن, يۆريت, اراب تىلدەرىندەگى «اقش ەلشىلىگى» دەگەن جازۋدى بايقاۋعا بولادى. ال يەرۋساليمدەگى اقش-تىڭ جاڭا ەلشىلىگى 14 مامىر كۇنى اشىلادى. وعان اقش پرەزيدەنتى دونالد ترامپ باستاعان امەريكالىق دەلەگاتسيا بارادى دەپ جوسپارلانعان.
بىلتىر دونالد ترامپ يەرۋساليمدى ءيزرايلدىڭ استاناسى رەتىندە مويىنداپ, امەريكا ەلشىلىگىن تەل-اۆيۆتەن كوشىرەتىنىن ايتقاننان سوڭ يزرايل-پالەستينا اراسىنداعى شيەلەنىس كۇشەيە تۇسكەن ەدى. يزرايل يەرۋساليمدى ماڭگىلىك استانامىز دەسە, پالەستينا بۇل قالانى ءوز مەملەكەتىنىڭ كاپيتالى سانايدى.
ليۆاندا 9 جىلدان سوڭ پارلامەنتتىك سايلاۋ وتكىزىلدى
ليۆاندا پارلامەنتتىك سايلاۋ 2014 جىلى وتكىزىلۋى كەرەك ەدى. بىراق جاڭا پرەزيدەنتتى سايلاۋعا قارسىلىق كورسەتكەن سوڭ پارلامەنت ءوز جۇمىسىن 2017 جىلعا دەيىن جالعاستىراتىن بولدى. سايلاۋ كۇنى 2017 جىلدىڭ 21 مامىرىنا بەلگىلەنىپ, ودان كەيىن قىركۇيەك, قازان ايلارىنا اۋىستىرىلعان ەدى. بىراق مەملەكەتتەگى ساياسي داعدارىس پەن كورشى سيرياداعى سوعىس سەبەبىنەن ءجيى اۋىستىرىلعان پارلامەنتتىك سايلاۋ تەك وسى جىلدىڭ 6 مامىرىندا ءوتتى. سايلاۋدا ليۆاننىڭ يران قولداۋىنا يە «حەزبوللا» ۇيىمى جەڭىسكە جەتتى.
«حەزبوللا» شيتتەر پارتياسى بيلىككە كەلگەن سوڭ مەملەكەتتىڭ پرەمەر-ءمينيسترى سااد حاريري باسقاراتىن «ال-مۋستاكبال» قوزعالىسى دەپۋتاتتار پالاتاسىنداعى بۇرىنعى ىقپالىنان ايىرىلدى. سايلاۋ ناتيجەسىندە بەلگىلى بولعانداي, «حەزبوللا» 128 دەپۋتاتتىق ورىننىڭ 67-ءسىن يەمدەندى.
ليۆان ىشكى ىستەر ءمينيسترىنىڭ ايتۋىنشا, داۋىس بەرۋگە حالىقتىڭ 49,2 پايىزى قاتىسقان. مەملەكەت استاناسى بەيرۋت قالاسىندا تۇرعىنداردىڭ تەك 30 پايىزى داۋىس بەرۋگە بارعان.
ايتا كەتۋ كەرەك, سايلاۋ بىلتىر قابىلدانعان جاڭا زاڭ بويىنشا وتكىزىلدى.
شولۋدى دايىنداعان گۇلنۇر قۋانىشبەكقىزى,
«ەگەمەن قازاقستان»
